JES (Joint Examination Scheme) - бу рус тилидаги «Молия ва бизнесни бошқариш» халқаро дипломи ва CFP (Сертификатланган молия мутахассиси) малакасини олиш учун ACCA ва ACFP қўшма имтиҳонлари схемаси. Қуйидагилар малакани олиши мумкин:

• B.FR, B.MA ва B.OO базавий имтиҳонларини топширган шахслар;
• CFS малакасига эга бўлганлар;
• АCCА аккредитациялаган олий таълим муассасаларида «Бухгалтерия ҳисоби» ёки «Аудит» мутахассисликлари бўйича университетнинг камида 2 курс битирувчилари;
• рўйхатга олинган АCCА талабалари ва ACFP аъзолигига номзодлар.

JES 6 та муҳим билим ва кўникмаларни қамраб олади:

• Молиявий ҳисобот - концептуал асослар, норматив-ҳуқуқий база, таҳлил ва талқин қилиш, консолидациялашган ҳисоботни тайёрлаш;
• Самарадорликни бошқариш - бошқарув ҳисоби усуллари, бюджетлаштириш, харажатлар ва оғишларни таҳлил қилиш, бизнес самарадорлигини баҳолаш;
• Молиявий менежмент - капитални бошқариш, инвестицияларни баҳолаш, хатарлар ва солиқларни бошқариш; 
• Аудит ва турдош хизматлар - аудит стандартлари, ички назорат, аудит ўтказиш ва ҳисоботларни тайёрлаш;  
• Ҳуқуқ - ҳуқуқий тизимлар, корпоратив бошқарув, капитал ва молиялаштириш; 
• Солиқлар ва солиқ солиш - Ўзбекистоннинг солиқ солиш тизими, солиқларни режалаштириш.

Диплом олиш учун сиз 6 та имтиҳон топширишингиз ва ахлоқ модулидан ўтишингиз керак: 

• FR - Молиявий ҳисобот (30 та тест + 2 та сценарийга доир топшириқ, 3 соат, АCCА ўтказади, £150);
• PM - Самарадорликни бошқариш (30 та тест + 2 та сценарийга доир топшириқ, 3 соат, АCCА ўтказади, £150); 
• FM - Молиявий менежмент (30 та тест + 2 та сценарийга доир топшириқ, 3 соат, АCCА томонидан ўтказилади, £150; 
• AA - аудит ва қўшимча хизматлар (15 та тест + 3 та сценарий, 3 соат, АCCА томонидан ўтказилади, £150);
• LW - Ҳуқуқ икки босқичда (B.LW ва C.LW, ACFP томонидан ўтказилади, 1-3 МҲЭКМ);
• ТХ - Солиқлар ва солиқ солиш икки босқичда (B.TX ва C.TX, ACFP томонидан ўтказилади, 1-3 МҲЭКМ).

Битта имтиҳонга тайёргарлик ҳафтасига 10-12 соат ўрганилганда 2 ойдан бошлаб вақт талаб қилади. Бутун дастур учун 18 ойдан бошлаб вақт ва камида 24 млн сўм керак бўлади.

ACCA имтиҳонларининг умумий нархи £600 ни ташкил этади (4 та имтиҳон £150 дан), ACFP имтиҳонлари -рўйхатдан ўтиш муддатларига қараб МҲЭКМнинг 4 бараваридан 12 бараваригача. Қўшимча харажатлар: АCCА кириш бадали £45, АCCА йиллик бадаллари £58, ACFP йиллик бадаллари 2 БҲМ.

Имтиҳонлар июнь ва декабрь ойларида имтиҳон марказларида ўтказилади.

JES дипломи қуйидаги афзалликларни тақдим этади:

• Мартаба ўсиши учун дунёнинг 176 мамлакатида халқаро эътироф этиш; 
• Ўзбекистондаги юз минглаб бухгалтерлар орасида ажралиб турадиган профессионал даражадаги CFP малакаси; 
• Қўшимча имтиҳонларсиз аудитор сертификатини олиш имконияти; 
• Раҳбарлик лавозимларига кириш: молия бўйича директор, бош бухгалтер, аудитор, бизнес-назоратчи, МҲХС ва солиқ солиш бўйича мутахассис;
• Автоматлаштириш ва СИ шароитида рақобатбардошликни ошириш; 
• АCCА тўлиқ малакасига (фақат 4 та имтиҳон топшириш қолади) ва ACFP илғор малакасига тайёргарлик босқичи; 
• Даромадни 50-100%га ошириш имконияти, айниқса раҳбарлик лавозимларида.